कोणाच्या हातात ते कधीच नसते
नसते तिला विषयांचे बंधन
अनायास ती कधीही स्फूरते
कविता कशावरही सुचू शकते
झाडांवर, फुलांवर, उमलत्या कळ्यांवर
पानांवर, रानांवर, शेतांवर, मळ्यांवर
चंद्रावर, सूर्यावर, पृथ्वीवर, देशांवर
देशात आढळणाऱ्या भिन्न भिन्न वेशांवर
कविता कशावरही सुचू शकते
रडण्यावर, हसण्यावर, कुंथण्यावर, कण्हण्यावर
कोणाच्या मौनावर, तर कोणाच्या म्हणण्यावर
दुःखावर, रागावर, प्रेमावर, रोषावर
निरागस बाळाच्या गोड गोड हशावर
कविता कशावरही सुचू शकते
जन्मावर, मरणावर, जीवनावर, जगण्यावर
मुलांवर, मोठ्यांवर, वृद्धांवर, तरुणांवर
तरुणांच्या रक्तात सळसळत्या जोशावर
विजयी चौकारानंतरच्या स्फूर्त जल्लोषावर
कविता कशावरही सुचू शकते
पक्ष्यांवर, प्राण्यांवर, किड्यांच्या गाण्यावर
पक्ष्यांच्या दाण्यांवर, चोचभर पाण्यावर
रानात बागडणाऱ्या पांढऱ्या सशावर
पाण्यात पोहणाऱ्या चपळ माशावर
कविता कशावरही सुचू शकते
मित्रांवर, नात्यांवर, सृष्टांवर, दुष्टांवर
जगतांना भोवणाऱ्या अगणित कष्टांवर
आपल्यात गुंतवून टाकणाऱ्या कोषांवर
कोषातील बंधनकारक अगणित पाशांवर
कविता कशावरही सुचू शकते
चेहऱ्यावर, डोळ्यांवर, गालांवर, ओठांवर
सडपातळ बांध्यांवर, सुटलेल्या पोटांवर
हवेत उडत्या शामल केशपाषांवर
सुरकुतलेल्या चेहऱ्याच्या एकेक रेशांवर
कविता कशावरही सुचू शकते
दारावर, पारावार, अंगणावर, मोरीवर
कपडे वाळत घातलेल्या दोरीवर
चुलीत धुमसणाऱ्या ओल्या कोळशांवर
धुरात जळणाऱ्या डोळ्यांच्या रेशांवर
कविता कशावरही सुचू शकते
-विवेक भावसार
